د اقتصاد وزیرې په کندهار کې د سوداګرو او صنعتکارانو ستونزې واورېدلې
۱۳۹۹/ کب/ ۱۴، کندهار
د هیواد د اقتصاد وزیرې ډاکټر کریمه حامد فاریابي د خپل سفر په ترڅ کې د پنجشنبې په ورځ په کندهار کې د سوداګرو او صنعت کارانو ستونزي او وړاندیزونه واورېدل. په دې لیدنه کې ولایت مقام مرستیال فیصل شیرزي، د ولسي جرگې وکیلان حاجي سیداحمد سیلاب او ګل احمد کمین هم حضور درلوده.
په غونډه کي د سوداګرو او صنعت کارانو د سوداګریزو فعالیتونو په پراختیا، د صنعت وده، د فابریکو د ظرفیت او کیفیت لوړول، په ګمرک د سوداګریزو موټرونو د محصول پروسې لنډول او صنعتي پارک کي لازمي اسانتیاوي رامنځته کول د خپلو عمده ستونزو او وړاندیزونو په توګه یادې کړې.
د اقتصاد وزیرې ویل: د دې له پاره، چي په ټول افغانستان د پانګونې فرصتونه رامنځته شي او د پانګوني له پاره داسې چاپیریال جوړ شي، چي لویې پانګونې پکي راونغاړل شي او په صادراتو کي زیاتوالی راوړل شي، نو لازمه ده نړیوال ټرانزیټي سیسټم او هوایي دهلېزونو ته ځانګړې پاملرنه وکړو، تر څو په نړیوال تجارتي سیسټم کي د افغانستان ونډه زیاته کړو . تر څو په ځان بسیا او پر خپلو پښو ولاړ او د پردو له احتیاجه خلاص افغانستان ولرو.
د اقتصاد وزیرې په کندهار کي د اقتصادي او صنعتي فعالیتونو د زیاتوالي لپاره د نویو پروګرامونو د ترتيبولو سربېره سوداګرو او صنعت کارانو ته د ستونزو د حل ډاډ ورکړ.
