د اقتصاد وزیرې د اقتصادي همکاریو سازمان (ECO) د منځ وزارتي په پنځمه ناسته کې ګډون وکړ
افغانستان - د اقتصاد وزارت: د اقتصاد وزیرې ډاکټر کریمه حامد فاریابي او د وزارت د تخنیکي او مسلکي معینیت سرپرست محمد نبي سروش، د اقتصادي همکاریو د سازمان ECO د وزارتونو ترمنځ په پنځمه ناسته کې چې تاجکستان هېواد کې ترسره شوې وه، په آنلاین بڼه ګډون وکړ.
ډاکټر فاریابي د تاجکستان په کوربه توب د (ایکو) ناستې له ترسره کولو او هم په ناسته کې د ټولو غړو څخه په دې نړیوال سازمان کې د هغوی د اقتصادي ګډو همکاریو لپاره او په ځانګړې توګه د کرونا ناروغۍ په حساسه موده کې د هغوی له همکاریو مننه وکړه.
د اقتصاد وزارت د تخنیکي او مسلکي معینیت سرپرست محمد نبي سروش، په دې ناسته کې ټینګار وکړ، چې افغانستان کولای شي د دغه سیمه ییز سازمان د غړو هېوادونو ترمنځ د اړیکې ورکولو پولې په توګه، د ترانزیټ، سوداګرۍ، پانګونې او ودې فرصتونه د سیمې د هېوادونو د پرمختګ لپاره د دې سازمان د ګډو همکاریو په چوکاټ کې رامنځته کړي.
ګډونوالو د اقتصادي همکاریو سازمان (ایکو) د پنځمې ناستې جوړولو موخه، د ګډو اقتصادي همکاریو د پروسې ګړندي کول، سیمه ییز تړون، د پانګونې پراختیا، بې وزلي او د ناوړه ناروغیو لکه کرونا سره مبارزې، د نشه کوونکو توکو د قاچاق څخه ډډه او ګډو پولو ته پاملرنه، وښودلې.
د (ایکو) سازمان یو سیمه ییز سازمان دی چې زیاتره د اقتصاد په برخه کې کار کوي او د افغانستان، ایران، ترکیې، پاکستان، تاجکستان، ترکمنستان، آذربایجان، ازبکستان، قزاقستان او قرغزستان په هېوادونو کې فعالیت لري.
دم ګړۍ، د یاد سازمان ریاست د تاجکستان پر غاړه دی او دغه ریاست به د یو کال لپاره وي.
