دکریم آغا خان پراختیایي بنسټ له سفیر او دیپلوماتیک استازي سره د اقتصاد وزیرې لیدنه
افغانستان- د اقتصاد وزارت: د کریم اغا خان پراختیایي بنسټ استازي او ورسره مل پلاوي د هیواد د اقتصاد وزیرې ډاکټر کریمه حامد فاریابي سره وکتل.
په دې لیدنه کې شهرزاده هیرجي او د نوموړي بنسټ اجراییوي رییس ډاکتر نجمالدین نجم د کریم آغا خان پراختیایي بنسټ د کړنو او لاسته راوړنو په اړه خبرې وکړې او ویې ویل: د آغا خان بنسټ د افغانستان د ودې او پرمختیا لپاره په بېلابېلو برخو کې د بنسټیزو چارو په کولو کې ژمنتیا لري.
د یاد بنسټ اجراییوي رییس د هېواد په شمال او شمال ختیځو سیمو کې د کرنې د پرمختیا په اړه خبرې وکړې او د افغانستان-تاجکستان ترمنځ د پولې مارکیټ د رامنځته کولو له پروګرام څخه یې خبر او زیری ورکړ.
نوموړي زیاته کړه، چې په دې برخه کې د ښار جوړونې وزارت او د نورو اړوندو ادارو په همغږۍ سره لومړنۍ چارې تر سره شوې دي او یاد بنسټ د دغو برنامو په پلي کولو کې ژمن دی . همدارنګه ډاکتر نجم د بامیانو او بدخشان ولایتونو کې د دوو ستندرد روغتونونو د جوړولو څخه هم خبر ورکړ.
د اقتصاد وزیرې په مختلفو برخو کې د آغا خان پراختیایي بنسټ له بنسټیزو کړنو او برنامو څخه ستاینه وکړه او د ځان بسیاینې، د بې وزلۍ کمښت، کارموندنې او د آسانتیاو په برابرولو کې یې ددې بنسټ د نورو مرستو او همکاریو په دوام ټینګار وکړ.
دا په داسې حال کې ده، چې د آغا خان پراختیایي او پرمختیایي بنسټ له ډېرو کلونو راهیسي د افغانستان د ودې او پرمختګ په ډګر کې فعالیت کوي. او د نورو سیمه اییزو او نړیوالو سازمانونو ترڅنګ د افغانستان یو ښه او تلپاتې همکار په توګه شمېرل کېږي.
