افغانستان کولای شي د روغتیایي صنایعو د تولید په برخه کې پر ځان بسیا شي
۱۳۹۹/ سلواغه / ۲۰
نن له غرمې وروسته د هیواد د اقتصاد وزیرې ډاکټر کریمه حامد فاریابي د لوکر ببي عمومي رییس نظیر احمد نور او د افغانستان د روغتیایي صنایعو د سکتور اجراییوي رییس احمد فیاض زماني سره وکتل.
په دې لیدنه کې د افغانستان د ځان بسیاینې لپاره د کورنیو تولیداتو د لوړولو په موخه په بېلابېلو طرحو باندې خبرې وشوې.
د هېواد د اقتصاد وزیرې په لوړ کیفیت سره د روغتیایي صنایعو د تولید د کچې لوړول د افغانستان د ځان بسیاینې لپاره اړین وبلل او زیاته یې کړه: مونږ په دې هڅه کې یو، چې پر ځان بسیا افغانستان ولرو او ددې لپاره کار کوو. نو په دې لحاظ د هیواد د بسیاینې لپاره د هر اړخیزو طرحو ملاتړ او ستاینه کوو.
همداراز نظیر احمد نور وویل، چې د خامو موادو د مالیاتي کچې د لوړوالو له امله ځینې سیال شرکتونه د ناسالمې سیالۍ په درلودو سره، بې کیفایته او تقلبي توکي واردوي او غوښتنه یې وکړه، چې د اقتصاد وزارت دې په دې برخه کې زیاته همکاري او پاملرنه وکړي.
د یادونې وړ ده، چې تر اوسه په هیواد کې اته شرکتونه د ماسکونو د تولید او مېرمنو او ماشومانو ته د روغتیایي توکو د تولید په برخه کې فعالیت کوي، چې کابو د مارکیټ ټولې غوښتنې ته ځواب ورکولای شي.
