وزیر اقتصاد با معاون اول ریاست‌جمهوری دیدار کرد
وزارت اقتصاد_ افغانستان: دوکتور کریمه حامد فاریابی وزیر اقتصاد، با جلالتمآب امرالله‌صالح معاون اول ریاست‌جمهوری در کاخ صدارت دیدار کرد.
وزیر اقتصاد، در این دیدار روی اهداف عمده‌ی سند دوم چارچوب ملی صلح و انکشاف افغانستان و اهداف انکشاف پایدار که اجندای جامع و همه شمول انکشافی برای تمام کشورهای جهان می‌باشد و افغانستان در کنار دیگر کشورها، متعهد به تطبیق آن گردیده است، صحبت نمود.
برعلاوه، روی تقویت روند هماهنگی و نهادینه سازی این اجندا در برنامه‌ها و فعالیت‌های انکشافی کشور، تاکید نمود و خواستار فعال سازی مجدد کمیته اجرایی اهداف انکشاف پایدار تحت ریاست مقام عالی معاونیت اول ریاست جمهوری گردید.
معاون اول ریاست جمهوری، ضمن قدردانی از فعالیت‌ها و دست‌آوردهای وزارت اقتصاد، به فعال شدن کمیته اجرایی اهداف انکشاف پایدار افغانستان، وعده سپرد.
گفتنی‌ست افغانستان منحیث عضو سازمان ملل متحد، متعهد به تطبیق اهداف انکشاف پایدار است.
